اوبتيموم تأمين - منيموم زياد

بصراحة... بما انو ما في أحلى من الصراحة، يا ابو الزوز:
انو عملت دعاية لمشروب، قلنا هالدعاية طفره، وهيو زياد حتى وهو عامل دعاية بقول ما في حاجة تنعمل دعاية بس "احتياطاً" مع انو كل الجمهور حيكون عم يشرب "المازا" بالماتش.. وافترضنا وحللنا انو هالدعاية بدها حدا ذكي ونغنوش لما يقول "الاحتياط واجب" تنفهم برضو بطريقة ذكية ونغنوشة.. وايه ضحكنا عالدعاية - بس تروح عامل دعاية لشركة تأمين ؟؟!!
هيدا مش اوبتيموم تأمين - هيدا منيموم زياد !

حقائق واستنتاجات مش علمية :|

1

بقولوا "كل شي بوقته حلو"، حتى الزعل بوقته حلو. بس عادةً لما تكون متحمس على اشي بتعمل حالك مش عارف او مش شايف المعوقات والعثرات امام حصول هالأشي وبتروح بتعمله وانت عارف انو مش وقته. بينما بحالات تانية، لما تكون مقلل خواصك، بتطلع كل الاسباب والحجج اللي بجيوبك منشان ما تعمل الاشي إياه، وبروح وقته... وبتروح عليك. 

زي ما بتعرف تميز امتى انت جوعان وامتى انت بردان، ضروري تتعلم تميز امتى وقته لانو ما حدا بقلك... ولا حدا ببعتلك ايميل حتى!