تدقيق نظري .. أو نظرك !

1

طيب ما دام رزق الهبل عالمجانين، رزق العقل عمين؟؟ يعني مش معقولة انو معتمد على الخمسة - ستة العاقلين اللي موجودين بهالمنطقة خاصة انو بدك تنبش الدنيا ويمكن ما تلاقيهن - عادة بكونوا متخبيين للمجنانين اللي ممليين البلد يخربولهن عقولهن و"كما جرت العادة" بس لما يموتوا منصير نقول وين كانوا هدول.. وين ...وين !!

رزق العقل زيو زي رزقنا بهالبلد – مالوش غير الله يتوكل عليه !

2

واذا بكرا بدوب التلج وببان المرج، كيف بدو يبان المرج اذا ما عنا تلج اصلاً ! وهل هذا يفسر حالة الجو الضبابية المستأصلة المتأزمة اللي ملزقة ب"---" وعجز هيئة الرصد الجوي عن تنبأ احتمالات انقشاع هذا الضباب بكرا او اللي بعده (او حتى بعد 20 سنة بس اعرف انو حييجي يوم صافي ويصافيني الجو مرة) - مع العلم بانو حتى توقعاتها لدرجات الحرارة زي توقعاتي باني اغير العالم واسحب الاسلحة النووية من كل الدول، اللي بتتفشخر بانو عندها اسلحة نووية واللي عاملة حالها معندهاش بس كلنا منعرف انو عندها، واعمل سلام بين كل الدول المتناحرة واقتصاد عالمي "سوليداري" وما يظل ولا ولد واحد فقير حتى بافريقيا!

ولا يمكن لانا عايشين بالعتمة منشوف الدنيا ضباب هيك و"ما هو لو بخلي الضو بصير الجو يعجبني"؟؟

بس على الأغلب، على الأغلب، شكلنا قد ما شفنا بطلنا بدناش نشوف!

3

واذا افترضنا انو مزبوط علمياً وحسب مبادئ الزراعة الحديثة انو لو "زرعنا لو بتطلع يا ريت"، ليش منظلنا نزرع لو ؟؟؟ ومتنحين كأنو ما في اشي نزرعو الا اللوات، ولو انو اليوم صار في غير البذور البسيطة بذور مفذلكة وحتى البصل صار في منو بطعم النعناع... اذا ما اخدنا فلسطين كمثال قد يدعي البعض بان زراعة اللو ليست بحاجة لمساحات زراعية خصبة وهي التي صادرتها اسرائيل وما زالت مستمرة بمصادرتها على حين غرة، حتى بهاللحظة وانت تقرا بهالسطور، أما القليل الذي تبقى منها فقد حفرنَا ومرمغنَا وبنينا عليه دور النا ولولادنا وحنى لقرايبنا اللي بريت لبلاد بنينا دور بتغار منها المستشفيات ووصينا اللي بركب حجر يحفر عالمدخل " ما شاء الله يخزي العين بنلعب فيها فوتبول".. وكله من فضل ربي (الكرمة لكبيرة اللي كانت باب الدار والدفليات وشجرة التين اللي كنتوا تعملوا عليها مرجيحة وانتو زغار واللي راح ابوك قلعهن وصب محلهم مصطبة باطون وحوط حوليها بسور فصل عنصري - برضو كانوا من فضل ربه!).

ولا يمكن التتنيح على زراعة اللو يقع ضمن منهج التتنيح العربي بشكل عام واستلذاذ العرب بالتفكير "الهيبوتيتي" الجميل اللي لا بحبل ولا ببيض – وبتقولو للمرة الالف و 846 انو الدنيا مش هيك بقلك بعرف بس انا حابب اشوفها هيك ! اشي طبيعي بدو يحني "---" المواطن العربي ويقعد!.

4

وما دام "ستبدي لك الايام ما كنت جاهله"، ليش احنا منحس اكتر ومنتأكد اكتر يوم بعد يوم انا عايشين بفيلم عنوانه "المجهول" وحتى اذا حدا منا قدر يرفع راسه ويطلع على الصورة من فوق بشوف انو مش مهم اي مسلك حتاخد، ان مشيت مع السير ولا عكسه، كما هو متبع في رام الله ومدن اخرى في ارجاء عالمنا العربي الرهيب، "فطريقك مسدود مسدود مسدود  يا ولدي" (والاصح "يا وردي ي ي" !!!)... مش يمكن لازم نرجع لدروس العربي – أدب قديم – ولسؤال الاستاذ نجيب في كل مرة "من القائل وما المناسبة؟؟" فقد يتضح بأن هذه المقولة كانت سارية المفعول لفترة زمنية محددة (لما الناس كانت تعرف اشي) أما ولم تعد صالحة للتطبيق منذ دهر ونيف – بقينا نحن زي الهبل مننتظر ما ستبدي لنا الأيام وهي عمليا مش رايحه تبديلنا اشي !

ولا معقوله انو بعد ما فتنا (او اندحشنا دحش) بالعصر "البوست-مودرني" بطلنا نلحق على فيض المعلومات المنهالة علينا من وسائل الاعلام المرئية والمسموعة والمقروءة والمشحرة (هاي الاخيرة تنحصر بالاساس على النت) والاعلانات اللي على الباصات والدعايات اللي بحمامات محطات البنزين وشبكة مقاهي اروما وأخواتها.. هالفيض يا بني آدمين صار طوفان ودفنا تحته وقد ما المعلومات طامرتنا من كل حد وصوب بطلنا نشوف اشي - وعليه على قد ما منعرف صرنا نحس انا منعرفش اشي – وهو المطلوب !

معلومات نازلة عليك من كل محل ≥ ولا مرة يساوي، اكبر منك دايما حتى لونك فرتيك ومفكر حالك الفهمان بين صحابك وهذا ليس مع انتقاص احترامك انما مع الاخذ بعين الاعتبار القدرات العقلية والجسدية المحدودة للكائن البشري

نتيجة 1 = مش شايف اشي..زيحوا عني دخيلكو

نتيجة 2= بظل الواحد ساكت وخانس بأي نقاش بنفتح واذا حظو سيء وواحد خبيت وجهلو سؤال مباشر بقولو تركني بحالي "أنا عيد ميلادي بنساه مرات"

ونتائج أخرى مهببة من المفضل عدم التطرق لها الآن

ولا فكركو كيف صار في من كل شي صنف ما بعد حداثوي.. كتابة ما بعد حداثوية، ورق دوالي ما بعد حداثوي (بجي على هيئة كرات مش أصابع)، وفن ما بعد حداثوي من النوع اللي بتشوفوا بتعمل حالك عم تسترسل امام هيبته واذا صارت وسألك الفنان "فاهم علي" بتهز براسك باعجاب وبتقولو "فاهم عليك" وانا عنكو التنين بقسم بحياتي انكو مش فاهمين اشي... ولسه هدول اللي مقدور عليهن (والطرق المتبعة عادة هي التطنيش\ السكوت\ المنافقة) بس شو بدك تعمل متلا مع المهندسين المعماريين البوست-مودرنيم اللي بعملولك البناية زي المتاهة وانت، للتوضيح، بتصير الفار بهالقصة، بطلاً ام مجبراً، اللي مهمته يصل المكتب دون ان يتأخر دقيقة واحدة عن موعد الدوام.. انو اوكي في متعة اكبر من انو تصل المكتب على طول بدون ما تلف حوليه 5- 6 مرات بس لازم تحسسني اني غبي وعاجز وانو ال "spatial perception" تاعتي وجودها او عدمه واحد عشان يقولو عن حضرتك مهندس "بوست-مودرني" !!!  اي تفي عليك وعلى هيك تخطيط.. منيح هيك!!!